قصة اتموت من الضحك

[ظبيانـي]

قصة غشيم في المغازل يقول:
المهم في عز النوم إلا فجأه رن التلفون
وطبعاً تلفوننا شايل ابوي منه كل الارقام ..مووب مخلي إلا رقمين التسعه والثمانيه .
يعني مالك إلا تدق على الشرطه ولا الدفاع المدني
وغيره ما فيه
المهم اني رفعت السماعه واقوول نعم .. إلا وذاك الصوت اللي يرد الروح
صوت بنت
واخوكم إذا سمع صوت بنت اووجعه بطنه ..وقالت الوو
. انا ما عاد عرفت وش اقول
انشلت براطمي ..الوو
قالت مين معاي
قلت معك انا ( صراحه جواب يدل على ذكائك)
وهي اللي تضحك .. وانا قلبي احسه موب طبيعي قالبها سامري
واستنزل عندي الكبد والبنكرياس
وانواع الرربكه .. قالت لي سوسو موجوده؟
قلت لها ..
ما ينفع حوحو؟؟
قالت مين حوحو ؟؟
قلت هذا اسم الدلع حق الحمار اللي هو انا
وضحكت للمره الثانيه على التوالي
قالت يؤ يؤ
شكلي غلطانه .. طيب آسفه ...
قلت لا عادي ... لا شكر على واجب ( دايم اسمع هالكلمه وجالس اتحرى الفرصه اني اقولها)
وقفلت السماعه..
تصدقون .........ما ادري وش صار فيني ؟؟ حسيت بشعقريره في جسمي ..
وان افرازات الخشم عندي زادت .. وان ودي ارووح انبطح في الحوش
واكتب قصيده هجائيه
لا يكون هذا هو الحب اللي يقولون (نعن ابو الحب اللي تعرفه يالضفدع))
عاد انا ماني متعود على البنات..
لان ماشألله بيتناا فيه خمس طعشر رجال
اللي هم انا واخواني وابوي وامي (الله يخلف على ابوك واميمتك هذا وانت اكبر اخوانك عليه العوض ومنه العوض)
المهم .. يعني انا واخواني ماشفنا بنت ابد........ وهذا اللي سبب لنا عقده تسمى العقده الفيسلوجيه((من وين جت ذي)
المهم .. اني قررت اني اتعرف على بنات .. بس عندي مشكله وحده اللي اني ما عندي اسلوب ابد ( يعني وقفت على الاسلوب نعن ابوك انت عندك الف مشكله ومشكله .. واهمها مشكله وجهك اللي كنه لوحة انتبه امامك نقطة تفتيش!!)
الوكاد اني مالقيت قدامي ألا واحد من العيال اسمه عبدوش .. معروف ان البنات ما يعوقون معه
وانا اللي القط مفتاح السياره واروح له الوكاد .. اني رحت لعبدووش .. وعلمته بوضعي وان امنيتي في الحياة التعرف على بنت قبل لا اموت (اخس يا الشايب !!)
فقالي اسمع .. السالفه بسيطه .. إذا تبي االبنت تحبك حسسها انها احسن وحده بالعالم
..قلت له يعني كيف ؟؟
اقولها انتي احسن من مارادونا !!!!!!
وهو اللي يرفسني برجله في بطني .. وقال لي .. انت ثوور .. وش دخل ماردونا يالغبي !!
انا قصدي انك تحسسها بانوثتها وان مافيه بنت بالعالم غيرها ..
قلت له برضه مافهمت
يعني تبيني اذبح كل البنات واخليها ؟
وهو اللي يموه علي برجله ويمحطني بيده على جبهتي..... وقال لي شوف انت حماار .. وماراح تفهم إلا بالدروس العلميه .. ويطلع جواله ويدق
وقال لي شوف انا هالحين باكلم وحده
وتعلم انت قلت له طيب وكلم وقال ...... هلا حياتي هلا عمري هلا روحي
انا لؤي حبيبك ومجنونك
(( الحمد لله على العقل ..نعن ابوك وين لؤي معه .والله لو اشوف وجهه في احسن الاحوال بعد ما اعطيه غير اسم جعفر قال ايش قال لؤي )
وقام يقولها احبك واموت فيك وانا بدونك مثل البيت بدون حاره
مثل التلفووون بدون حراره مثل السواق بدون سياره
انا البنزين وانتي الشراره .. انا الشارع وانتي الاناره
انا الرومنسيه انتي الاثاره انا مبنى التجاره العالمي وانتي الطياره(((((قسم بالله اني بغيت اضمه وابوسه يوم سمعت كلامه حسيت بشعور غريب نعن ابليسه لو يكلم جدار كان ذاب)))))))
المهم انه خلص المكالمه والتفت لي وقال لي يالله دورك
بعطيك رقم بنت وكلمها وقول لها نفس كلامي
قلت له بكل خجل ..طيب..وهو اللي يدق علة بنت ويعطيني الجوال عشان اكلمها وانا اللي اقول الوووووو يوم سمعت صوتها ضاعت علومي ونسيت كل الكلام وقلت لها بابا فين؟؟
وما حسيت إلاااا بذيك الجزمه اللي لازقه في مقفاي..
وقال لي .. قوول نفس الكلام اللي قلته يا ثووور
وانا اللي اقول لهااا
هلا حياتي هلا روحي هلا تعالي .. وقالت طيب ..قلت انا بدونك مثل الكيبورد بدون فاره
مثل الحمار بدون حماره
مثل السلطه بدون خياره
انا محترف وانتي نضام الاعاره انا.. الولاعه وانتي السجاره
انا الددسن وانتي الغماره انا الصرصور وانتي البياره ....
انا طو طووووط طوووط طوط قفلت الخط في وجهي
قال عبدوش وش فيك ؟؟
قلت له الخط مشغول (( مايعرف يصرف ابد))
ومادريت إلا وعبدوش مطلع لوح فيه مسامير ودبجني فيه اللين قلت للعنز يا خاله
المهم اني رجعت للبيت ودمي يصب ومالي وجهي من كثر الطق اللي جاني من عبدوش
لدرجة ان اللي يشوفني مايعرفني ..طالع كني مسابقة من صاحب هذه الصوره اللي يحطونها بالجرايد
وانا اللي ادخل البيت بشويش عشان ما يشوفني احد وطلعت غرفتي واسكر غرفتي وانام
وفي عزالنوم
دق جرس التلفون وارفع السماعه إلا هي نفس البنت اللي كلمتني اول مره
قلت نعم قالت سوسو موجوده ؟؟
قلت لها شوفي بيتنا كله شباب ومافيه احد يبدا اسمه بحرف السين .. اناواخواني كلنا اسمنا خالد ومافيه إلا اخوي الصغير فهد هو اللي اسمه نايف ونناديه عبدالرحمن
( وش عنده عادل إمام )
والبنت كررتها ضحكه ..وقالت مشألله دمك خفيف..(( هي تحسبني استهبل ما درت اني دلخ من جد ))
وقلت لها ..شكراً
...( مسوي مؤدب))
وسألتني البنت .. وش تسوي هالحين ؟؟
قلت لها والله كنت نايم ..قالت يؤ يؤ .. تنام في الليل انت ؟؟!!
قلت اجل متى انام ؟؟
قالت لا انا انام في النهار واسهر في اليل
قلت لها ليش ؟؟ الاخت بومه؟
قالت لا بس الليل وقت الرومنسيه
انت تعرف الرومنسيه؟؟
قلتلها لا والله ما اعرف بنات
انا .....!! ((مسوي فيها فاهم ))
وسألتني انت وش اسمك ؟؟قلت لها مصيول ..
قالت وش معناه ؟؟
قلت لها هذا اسم كلب كان عند جدي وسماني ابوي عليه
وسألتها .. وانتي وش اسمك؟؟ قالت داليدا
قلت لها ابي اعرف اسمك ..مو عيارتك قالت هذا اسمي
((هذولي البنات تسألها وش اسمك تقول رهف ولا شوق ولا افنان ولا عذاري بس انها من جنبها ))
سويت فيها اسلوب وقلت لها اني حبيت وحده بس انتهىهالحب لان اللي حبيتها خانتني
قالت لي من حبيت ؟؟
قلت لها حبيت عنز جيراننا بس انها خانتني مع تيس سوري ...على شان له قذله
المهم ان البنت قالت لي اوكي اكلمك بكرى لان امي تناديني
قلت مو مشكله
وتطورت العلاقه .. وصرنا نكلم بعض كل يوم ..
<<<<<<<< تكمله

[ظبيانـي]

وانا انقلب حالي .. ولاحضو اهلي اني تغيرت .. يعني نكون جالسين على الغدى ولا العشا
وانا ما اكل سارح .. ولاحضو اهلي اني صرت مؤدب واقرا واجد وانا اقرا على شان .. اعرف كلام جديد في الحب والشعر والطبخ (( لا تستغربون لان كتب الطبخ اتعلم منها كلام حلو بعد .. مثل يا عسل يا حليب يا قشطه يا كريم كرمل ))
وبرضه صرت ادخل كتب ممنوعه للبيت مثل كتاب مذا تفعل في ليلةالدخله
وكتاب سنه اوللى زواج المشكله انها ضاعة الكتب مني وصرت اروح عند بيارةجارنا اللي طافحه وافكر وأتأمل وارمي فيها حصى (( مسوي رومنسي مثل اللي يجلسون على البحر يرمون حصى ))
المهم انه في ليله من الملاليل قالت لي البنت مصيول ... اوصف لي شكلك
ياوالله البلشه .. وش اقولها هذي هالحين ..؟؟اقولها اني قرد اعترف لها بالحقيقه المره واقولها اني جدار بلا ملامح ؟؟ اعترف لها اني شبيه عبد الله سليمان (( الحمد لله والشكر ))
الوكاد اني قلت في نفسي يا ولد خلني اسوي مثل كل الشباب
وانصب عليها يعني تلقا الواحد من الشباب شين .. وإذا شفته بالشارع ما تدري هو رايح ولا جاي لان وجهه ماله معالم .. ولو تشوف وجهه تحسبه واحد معطيك مقفاه يعني المفروض يحط لوحه على وجهه يكتب هذا وجهي ... على شان الناس مايلخبطون بين وجهه وقفاه .. وانا مثلكم واردا بعد...انا إذا قابلت احد يقعد ساعه محتار وين وجهي من قفاي ومايعرف إلا إذا لقا الورقه لان فيني ورقه مثل اللي تجي في الفنايل والسراويل على شان تعرف ورا من قدام
المهم اني قلت لها انا عيوني مثل عيون جواد العلي ..وطولي مثل طلال الرشيد وخشمي مثل خشم خالد عبد الرحمن وملحي مثل ملح راشد الماجد ومهضوم كثير مثل رامي عياش (( والله ماناقص إلا تحط ملحن معاهم ويكمل الاأوبريت ))
الوكاد ان البنت شكلها خقت معي وقامت تشاهق من الفرحه وسألتها وانتي اوصفيلي شكلك ؟؟ قالت ما اقدر ..
لما تشوفني بتعرف لان مالي شبي ((اخس يا برتني))
وانا اللي افك خشتي وسعابيلي تقوطر كني كلب شايف له عضمه قلت لها يعني بشوفك .؟؟ قالت اكيد انا بكرى بروح شاليهات اليمامه اللي على طريق الرياض الخرج ونتقابل هناك قلت لها بس هذيك للعوائل بس قالت عاد انت دبر نفسك قلت اوكي مو مشكله بس كيف اعرفك ؟؟ قالت بيننا الجوال إذا وصلت كلمني وانا اعلمك وين تلقاني قلت لها خلاص الوعد هناك ...المهم اني انا توهقت وشلون ادخل الشليهات وهي للعوايل؟؟ وقلت مالي إلا عبدوش اتصل عليه واتفاهم معه ودقيت عليه ورد علي وقال بعصبيه نعم وش تبي يا الغبي ؟؟ وعلمته بالسالفه من سل سل إلين طقاق عليكم (( تراني اقصد من طق طق إلين السلام عليكم بس مدلخ شوي ))
وقال لي والله صعبه وش بتسوي؟؟ قلت له وش رايك تلبس عباه وتسوي نفسك حرمه ؟؟ تروح معي على انك زوجتي ؟؟ وهو اللي تغير وجهه وقال انا ولد ابوي قلت له بالله توني ادري كنت احسبك ولد ابوي انا قال تستهبل يا الزبال ؟؟ انا اسوي نفسي حرمه ؟؟ ياويل ويلي ويلاه خيل الخيل خيالها .. قلت له يا رجال كل لك تبن لا ادوس ببطنك جالسين في مضارب الباديه احنا؟؟!! قالي لا يا مصيول هذا شي ما اقدر عليه .. وش اقول للجماعه؟؟ قلت له من قالك اننا بنحضر عرس ؟؟ حنا بنروحالشليهات وانت ماراح تكشف وجهك ابد قال طيب ليش انت ما تسوي نفسك حرمه ؟؟ وانا الرجال قلت له يا اخوي انا ما اقدر .. لاني لا رجال نافع ولا حرمه نافع وبعدين حتى لو غطيت وجهي بيكشفون اني ماني حرمه من ريحتي اللي كنها ريحت شرابات عزوبي قالي خلاص بس لا احد يدري .. قلت له ابشر .. بس جهز نفسك بكرى .. بمرك ونروح ...... واخذت سيارت واحد من العيال ورحت لبيت عبدوش ولقيت عند بابهم شحاده وهي اللي تجي تبي تركب قلت لها الله يعطينا ويعطيك ياخاله وهي اللي تطق قزاز السياره شوي وتكسرها وانا اللي اطلع من جيبي ريال ونص كنت ناوي اشتري فيه توكس بس قلت مو خساره فيها .. على شان الله يوفقني وتوني افتح الدريشه بعطيها إلا وهي تقول افتح الباب الله ياخذ هالراس ...... الصووت مو غريب علي .. يوه عبدوش.. قتال ايه عبدوش الله لا يبارك فيك افتح بسرعه قبل لا يطلع احد من اهلي وفتحت له الباب وركب وانطلقنا لشاليهات .. المهم وصلنا الشليهات ونزلنا من السياره ...وامسك يد زوجتي اللي هي عبدوش سابقاً ودفعنا التذاكر ويوم جينا ندخل وقفنا الحارس اللي على الباب .. وقال لحضه .. لازم زوجتك تدخل محل تفتيش النسأ لاننا شاكين فيها قلت له ليش في مطار حنا.؟ تراه شاليهات وبعدين وش فيها زوجتي ؟؟قال الحارس ياخوي وش الحرمه اللي لابسه زبيريات !!!! وانا اللي اناضر في رجول عبدوش إلا فعلاً لابس زبيريات .. يالله لا تفضحنا .. وانا اللي اقول للحارس ممكن تتركني مع زوجتي ؟؟ ابيها في كلمت راس ؟؟ قالي ادخل هالغرفه فاضيه تفاهم معاها وانا اللي اسحب عبدوش في الغرفه واترفس في بطنه وانواع الاكواع ...نعن ابوك يا الغبي زبيريات مره وحده !! ؟؟ قال وش اسوي ؟؟ مالقيت جزمه على مقاسي ..... قلت له اسمع نزل العباه على رجولك على شان ما احد ينتبه يا الغبي المهم اننا رجعنا للحارس واعتذرنا منه على سوء التفاهم ودفيناه بمية ريال على شان يسكت ..واول ما دلخنا استاجرت شاليه صغير وقلت لعبدوش يجلس فيه .. وانا ابي اروح ادور خويتي .. وطلعت ودقيت جوال على خويتي .. ووصفت لي مكانها تقول انها عند الشجر اللي جنب المطعم وانا اللي اروح هناك وجلس ساعتين ادورها مالقيتها .. قلت لها وينك فيه ؟؟ لي ساعتين ادورك ؟؟ قالت انت وينك بالضبط ؟؟ قلت لها انا واقف جنب كيس زباله .. وانتي وينك ؟؟ قالت انا واقفه جنب واحد شكله مجنون وعليه قل صح ..... وانا اللي التفت وراي أووووووب هذيهي !!؟؟((افا طلعت انا المجنون اللي تقصده وطلعت هي كيس الزباله اللي انا اقصده ))وهي اللي تنصدم وقالت هذا انت !! وين الوصف اللي تقول اجل طلال الرشيد هاه ؟؟؟امحق طلال اللي تشبه له انت (( صادتني ان عيوني مثل عيون خالد الملا وجسمي مثل نبيل شعيل .. وخشمي مثل عبد المجيد عبد الله ))قلت لها لا انا فعلاً مثل ما قلت بس صار لي حادث هو اللي اثر على وجهي ولا انا كنت حلو (( أي هين )) قالت مو مشكله اهم شي اسلوبك اعجبني قلت لها اشوى ان فيه شي اعجبك فيني طلبت منها انها توريني وجهها ... قالت طيب بس لا يشوفنا احد .. وانا اللي اغطي عليها وقلت لها يالله بسرعه وهي اللي ترفع الغطوه وانا اللي اضحك .. قالت وش فيك تضحك ؟؟ قلت لها يالله عاد بدون استهبال قالت وش فيك ؟؟ قلت لها يالله بسرعه شيلي القناع اللي على وجهك لا تستهبلين وهي اللي تقول .. هذا وجهي الصدقي يا القرد....وانا اللي انصدم واحس ان الارض تدور فيني .. وش ذا الوجه الشين اول مره اشوف وجه يطلع منه ريحه مخيسه .. نعن ابوها حتى الشجره اللي كنا واقفين جنبها رفعت ثوبها وانحاشت .. وكل الشجر اللي كان حولنا انحاش وراح مكان ثاني من شين وجهها وانا كنت حاط في بالي كلام رومنسي جلست عشرين دولار يوم احفض فيه على شان إذا شفتها اقوله لها بس يوم شفت وجهها اللي كنه وجه واحد جالس في مجلس رجاجيل وفيه اسهال .......وضيعت كل الكلام اللي حفضته وقمت الخبط بالكلام سألأتها ليش الغمس ساكن عيونك ؟؟ جاوبتني من الارق ... سألأتها وش هالببسي اللي مكبوب على ثوبك ؟؟ جوبتني هذا ماهو ببسي هذا مرق ..سألأتها طيب ما عندك غير هالثوب ؟؟ جاوبتني إلا كان عندي بس انسرق ... سألتها طيب ما دانمك شينه وشوله تغازلين ؟؟ جاوبتني انا كنت حلوه بس وجهي انحرق .. سألتنني وش رايك فيني ما اشبه باسكال؟؟ جاوبتها انتي جسمك جسم باسكال بس الوجه الله خلق وفرق المهم اني ما قدرت اتحمل وجهها وقلت لها انتي جدك الاكبر كان غوريلا ؟؟؟ قالت لي لا تطنز انت ووجهك .. انا اول كنت مصدقه ان الدينصورات انقرضت .. بس من يوم شفت وجهك عرفت ان الكلام اشاعات ... قلت لها شوفي يا انسه جراده انا ودي اجاملك واقول لك كلامك حلو بس وجهك يقول مالك امل ..!! قالت لي والله حتى انا ودي اقولك كلام حلو بس وجهك مايساعد .. وجهك كنه دعايت لا للمخدرات المهم ان كل واحد منا تفل في وجه الثاني ورحنا وانا من الصدمه توقف تفكيري كل امالي واحلامي راحة ادراج الدواليب ... وركبت السياره ورجعت للبيت وانا متحطم كنت متخيلها مثل مايا نصري ولا اليسا طلعت مثل فطومه ...لا خلاص ماعاد ابي اتعرف على بنات ((تكفى اخر مره حرام تحطم قلوب المعجبات يا راغب علامه اقول انطم بس )) الوكاد اني سكرت باب الغرفه ونمت نومت عدوكم ((مسوي علوم رجال )) ومادريت اليوم الثاني إلا باللي يرفس الباب وانا اللي انقز من فراشي وش السالفه يا الربع ؟؟إلا وهو ابوي يصايح افتح يا السمرمدي ... افتح لا بارك الله فيك .. وانا اللي افتح الباب إلا وابوي في وجهي .. ووجهه مايطمن .. ويطلع ذيك العجرااا من وراه وانواع التلحيط واخواني وامي واقفين عند الباب يتفرجون عند الباب .... من لقاها مصارعه على الطبيعه ..المهم ان ابوي شغال ضرب فيني .. ويقول تتزج من ورانا يا الخسيس قلت له والله ماتزوجت قال الا لان الشاليهات اتصلو علينا وقالو خلو مصيول يجي .. ياخذ زوجته اللي نساها امس ...وانا اللي تضيع علومي .. وابي افهم ابوي السالفه بس انه شغال ضرب فيني .. ماترك لي فرصه وبعد جهد جهيد .... قدرت انفك من ابوي ورحت لاخر الغرفه وياخذ ابوي انعال ويرميها علي وانا اللي اوخر عنها بسرعه وامسكها بفمي (( مثاثر بالافلام ))وخواني يوم شافوني سويت هالحركه وهم اللي يصفقون ويصفرون لي .. وانا اللي اتحمس وانط على ابوي وامسكه مسكه منومه ((خربها الغبي مع ابوه )) وينط واحد من اخواني ويمسك يد ابوي ويرفعها اول مره وطاحت وثاني مره وطاحت ويرفعها ثالث مره وطاح ......لا لا لا غير معقول رفع ابوي يده وقام يأشر بصبعه يعني لا تراني مانمت ...ويوم شفته مانام وانا اللي اقوم وامسك رجوله واسوي له حركه مقصيه على شان يستسلم بس ما استسلم واخواني يقنعونه انه يستسلم ...بس هو عنيد يحاول يزحف عند الحبال .. بس انا ماخليته ينفس ..وفجاه ...اووووووووووه لا تدخل خارجي امي جابت المقلاة ومحطتني على جبهتي محطه مدويه وتدخلو اخواني ومسكو امي طلعوها برا الحلبه ((عائلة دلووخ ))المهم اني دخت ولا عاد ادري وين انا وطحت مكاني ويزحف ابوي بشويش ويحط يده على صدري ويعدون اخواني وادح .. ثنين .... ثلاثه ..... فاز ابووووووي هييييييه ((الحمد لله والشكر )) المهم اني فهمت ابوي السالفه ((ما اصلح في جريات ابد اعلم واكع على طول )) ونمر بيت ابو عبدوش ونعلمه وانواع اتمحيط فيني المهم اننا وصلنا الشاليهات ... وقلت له معي مفاجأه ... وهو اللي يضحك .. قال والله اني خابرك ذيب ماتترك خويك ...كذا ارجال ولا بلاش ... وانا اقول في صدري أيه هين وهو يقول اكيد بتعرفني على وحده من خواتها .. قلت ايه انا بعرفك على وحده صحيه .... وهو يبي يشوف المفاجأه يبي يفصخ العباه قلت له خلها عليك ... كذا احسن ..((انواع انذاله فيني )) وصلنا السيارة الا وابو عبدوش ماسك مفك العجل ((الكفر )) في يده يحتري ولده وعبدوش من هول الصدمه ماعاد شالته رجليه ...طاح بمكانه وقام يصيح ...ويولول .. وستلمه ابوه انواع تفقيع الوجه وانواع الترفيع والتنزيل ..وانا جالس اتفرج ومبسوط ومادريت إإلا وابوي ماسكني وانواع اركب ... وانا اللي اصيح فيه هيه يا ابو الشباب حلا هي؟؟ توك طاقني قبل شوي .....؟؟ قال ابوي ايه صحيح بس عيب الرجال يطق ولده وانا جالس اتفرج...لازم اسوي شي انا بعد ..((لا صراحه ان ابوي فاهم في الاصول طالع لي ))المهم عقب الطق اللي كليته انا وعبدوش تزاعلنا مع بعض وانا حرمت اتعرف على بنات .. ومثل ما قال المثل ابعغني وه مشكلني حبك يا روح الروح مشكلني .....يا لبيه يا البنات اللي مع راشد في الفديو كليب اروح طحينيه معاهم ((شكله ماتاب ناوي ينطق مره ثانيه ))
اسف طولت عليكم

[ذهب]

ههههههههههههههههههه


تعبت وأنا اقراا ,,,بس حلوه


يسلمووووووووو

[همس الهدب]

هههههههههههههههه
حلوووووووووووووه
الله يعطيك العافيه

[المغرومة]

هههههههههههههههههههههههههههههههههههههههههههههههههه ههههههههههههههههههههههههههههه
طقت عروقي من كثر الضحك
يسلمووووووووووووووووووووووووا في انتظار جديدك
المغرومة